Hvað er súrefnismeðferð?

Styrkur súrefnis í andrúmslofti er um það bil 21%, en meðferðin fer fram í klefa sem er stilltur á yfirþrýsting, sem jafnast á við þrýsting 5.3m undir vatni. Yfirþrýstingurinn eykur súrefnisþéttni í loftinu sem þú andar að þér um uþb 50% eða í 31%. Meðferðin er þægileg en fólk getur þó fundið fyrir hellu fyrir eyrun rétt á meðan er verið að hækka og lækka þrýstinginn í klefanum. Rannsóknir hafa sýnt fram á fjölþættan ávinning súrefnismeðferðarinnar allt frá fljótari endurheimt eftir meiðsli til góðs ávinnings vegna meðferðar við langvinnum eftirköstum af Covid 19.

Af hverju ætti ég að fara í súrefnismeðferð?

Ávinningur súrefnismeðferðar felst í að skapa ákjósanlegar aðstæður fyrir efnaskipti, hámarka afkastagetu og bæta forsendur til að endurheimta eðlilega starfsemi líkamans.

Ábendingar geta því verið mjög margvíslegar og í raun má segja að súrefnismeðferð geti hægt á öldrun frumna með því að veita þeim hagstæð skilyrði til heilbrigðis. Ávinningurinn tengist því ýmsu allt frá því að hámarka afköst og endurheimt fyrir íþróttafólk yfir í að vinna á heilsufarslegum vandamálum og stuðla að almennu heilbrigði.

Þarf ég að fara í sturtu fyrir og eftir súrefnismeðferð?

Þú þarft ekki að fara í sturtu hvorki fyrir né eftir meðferð.

Hverju ætti ég að klæðast í súrefnismeðferð?

Þú ferð í klefann í þínum fötum og ekki er nauðsynlegt að vera með æfingaföt. Klefinn hitnar aðeins á meðan að meðferð stendur og getur því verið gott er að klæðast léttum og þægilegum fötum. Við mælum með að hafa vatnsflösku meðferðis, en það getur verið gott að fá sér nokkra sopa til að jafna þrýstinginn í eyrunum á meðan að þrýstingurinn er að hækka.

​Hversu oft get ég farið í súerefnismeðferð?

Það fer eftir hvaða ávinning þú sækist eftir, en þér er velkomið að leita til okkar með vangaveltur og við gerum okkar besta til að leiðbeina þér.

​Hver ætti ekki að fara í súrefnismeðferð?

Ómeðhöndlað loftbrjóst, hjartabilun, mikil innilokunarkennd, nýlegar aðgerðir á hlust, hiti og veikindi eru dæmi um frábendingar. Þér er velkomið að hafa samband við okkar sérfræðinga sem geta leiðbeint þér frekar.

Hvað er rauðljósameðferð?

Í rauðljósameðferð eru ljós af ákveðinni bylgjulengd (633 – 660 nm (rautt) og 850 – 940 nm (NIR)) notuð til að örva virkni fruma. Tæknin byggir á þeirri staðreynd að ljós af þessari tíðni nær í gegnum húð og kemst inn í frumur og veldur þar viðbrögðum sem geta haft margvísleg jákvæð áhrif. Það má í raun lýsa rauðljósameðferð sem orkuaukandi meðferð fyrir frumur líkamans.

Mögulegur ávinningur rauðljósameðferðar er margþættur og víðtækur. Meðferðin styður við virkni og orkubúskap fruma og getur flýtt fyrir bata. Hún hentar bæði íþróttafólki og þeim sem vilja miða á betri almenna heilsu.

Hvernig virkar rauðljósameðferð?

Þegar frumur taka upp orku rauða ljóssins þá eykst orkuframleiðsla í formi ATP, aukning verður á kollagen framleiðslu, oxunarálag minnkar og hraðari endurheimt næst í vöðvum. Fjölmargar rannsóknir liggja að baki þessum fullyrðingum sem hægt er að lesa um á veraldarvefnum, t.a.m. hér og hér.

Hverju ætti ég að klæðast í rauðljósameðferð?

Mælt er með sundfatnaði eða nærfatnaði í rauðljósameðferðinni. Gott er að fjarlægja skartgripi og hafa sem minnst af farða.

Þarf ég að fara í sturtu fyrir og eftir rauðljósameðferð?

Bekkurinn sjálfur hitnar smám saman á meðan á meðferðinni stendur en blóðflæði eykst og því hitnar mörgum í meðferðinni og geta jafnvel svitnað þegar líður á. Mörgum finnst því gott að skella sér í sturtu eftir rauðljósameðferð.

Af hverju ætti ég að fara í rauðljósameðferð?

Ávinningur rauðra ljósa felst í að skapa ákjósanlegar aðstæður fyrir efnaskipti, hámarka afkastagetu og bæta forsendur til að hámarka eðlilega starfsemi líkamans og húðar

Ávinningur rauðljósameðferðar gæti meðal annars hjálpað við:

• Að auka blóðflæði

• Hafa jákvæð áhrif á húð

• Að stuðla að bólgulækkun í vöðvum og liðum

• Að hafa jákvæð áhrif á hárvöxt

• Aukningu í endurheimt eftir æfingar

Ávinningurinn getur því tengst ýmsu, allt frá því að hámarka afköst og endurheimt fyrir íþróttafólk yfir í að stuðla að almennu heilbrigði og vellíðan.

Hversu oft get ég farið í rauðljósameðferð?

Það fer eftir því hvaða ávinningi þú sækist eftir, en þér er velkomið að leita til okkar með vangaveltur og við gerum okkar besta til að leiðbeina þér. Margir koma 3x í viku til að byrja með á meðan verið er að sjá þann árangur sem leitað er að en viðhalda svo stöðunni með því að koma í framhaldi 1-2x í viku.

Hvað er kuldameðferð?

Cryotherapy eða kuldameðferð þýðir einfaldlega meðferð í miklum kulda. Hún fer fram í klefa sem er kældur niður í -140°C og meðferðin varir í 2-4 mínútur.

Af hverju ætti ég að fara í kuldameðferð?

Sýnt hefur verið fram á margvíslegan ávinning af kuldameðferð. Flestir finna strax fyrir jákvæðum áhrifum á borð við vöðvaslökun, hressandi áhrif, orkuaukningu og frískleika.

Kuldameðferðin getur aukið losun endorfíns í líkamanum og þar með gefið okkur aukna vellíðan og orku. Áhrifanna gætir yfirleitt í 6-8 klst eftir meðferð. Margir finna einnig fyrir bættum svefngæðum eftir kuldameðferð.

Önnur rannsökuð áhrif af kuldameðferð eru til dæmis aukið insúlínnæmi, hraðari efnaskipti og aukinn fitubruni.

Þarf ég að fara í sturtu fyrir og eftir kuldameðferð?

Nei, það er ekki þörf á því. Kuldameðferðin fer fram í þurrum klefa og þú hvorki svitnar né blotnar.

Hverju ætti ég að klæðast í kuldameðferð?

Mælt er með sundfatnaði eða nærfatnaði í kuldameðferðinni. Gott er að vera í inniskóm og vettlingum og hvoru tveggja færðu á staðnum hjá okkur. Taka skal skartgripi og úr af áður en farið er í meðferðina. Mikilvægt er að bæði einstaklingurinn og fatnaður séu þurr þegar farið er í meðferðina.

Hversu oft get ég farið í kuldameðferð?

Það er hægt að fara í kuldameðferð án áhættu allt að tvisar sinnum á dag en mælt er með 2-3 í viku. Sumt íþróttafólk fer allt að 5 sinnum í viku í kuldameðferð.

​Hver ætti ekki að fara í kuldameðferð?

Ófrískar konur, fólk með ómeðhöndlaðan háþrýsting, gangráð eða í krabbameinsmeðferð ætti ekki að fara í kuldameðferð. Aðrar frábendingar fyrir kuldameðferð eru nýlegir blóðtappar, brjóstverkur, grunur um hjartavandamál, hiti, almenn veikindi og opin sár. Að auki ætti ekki að nota kuldameðferð undir áhrifum áfengis eða annarra vímugjafa.